30.4.2019 | Fréttir

Áframhaldandi vöxtur hjá Advania á Íslandi

advania colors line
Árið 2018 var mjög gott rekstrarár hjá Advania á Íslandi. Tekjur, EBITDA og rekstrarhagnaður jukust á milli ára. Óvissuástand í efnahagslífinu hafði þó áhrif á reksturinn á síðustu mánuðum ársins.
Tekjur Advania á Íslandi á árinu 2018 numu 15,1 milljarði króna og jukust um tæp 20% milli ára. EBITDA jókst á sama tíma um tæp 11% og nam 1,3 milljarði og rekstarahagnaður (EBIT) jókst um ríflega 24%, fór úr 633 milljónum króna árið 2017 í 787 milljónir krónur árið 2018.

„Á heildina litið er ég mjög sáttur við rekstrarniðurstöðu ársins, sérstaklega ef tekið er tillit til þess að síðustu mánuðir ársins lituðust af óvissu í efnahagslífinu og kostnaðarhækkunum. Árangurinn skýrist fyrst og fremst af aukinni eftirspurn eftir þjónustu Advania. Sífellt fleiri fyrirtæki og stofnanir sjá tækifærin í að fela okkur heildarumsjón með rekstri sinna upplýsingakerfa. Eins var nýjum þjónustulausnum, svo sem frá Outsystems og Salesforce, mjög vel tekið á markaðnum. Til marks um gott gengi okkar valdi Microsoft Advania samstarfsaðila ársins annað árið í röð,“ segir Ægir Már Þórisson forstjóri Advania á Íslandi.

Hann bendir á að hægagangur í viðskiptalífinu á síðustu mánuðum ársins hafi haft áhrif á rekstur fyrirtækisins. „Þau neikvæðu áhrif héldu áfram fyrstu mánuði þessa árs. Ekki er útséð með hvaða áhrif nýir kjarasamningar munu hafa en óvissan í efnahagslífinu hefur minnkað. Við merkjum jákvæðari tón í samtölum við okkar viðskiptavini. Þannig finnum við fyrir stóraukinni eftirspurn eftir ráðgjöf um stafræna stefnumótun, enda öllum orðið ljóst að snjöll notkun á upplýsingatækni er forsenda árangurs í rekstri. Við horfum því mjög björtum augum á komandi mánuði og árið í heild,“ segir Ægir Már.

Mynd: Framkvæmdastjórn Advania á Íslandi. Frá hægri: Sigurður Sæberg Þorsteinsson, Jón Brynjar Ólafsson, Ægir Már Þórisson, Anna Björk Bjarnadóttir, Sigrún Ámundadóttir, Einar Þórarinsson og Kristinn Eiríksson.
TIL BAKA Í EFNISVEITU