Sjálfsafgreiðsla vinsæl í Krónunni

Fréttir
23.04.2018
Í rúman mánuð hafa viðskiptavinir Krónunnar í Nóatúni haft val um að afgreiða sig sjálfir við nýja afgreiðslulausn eða greiða fyrir vörur á hefðbundinn hátt við mannaða afgreiðslukassa. Sjálfsafgreiðslan hefur gengið svo vel að á næstu vikum verða fleiri slíkir kassar teknir í notkun í nýjum verslunum Krónunnar á Hvolfsvelli og í Garðabæ.

„Strax á fyrsta degi sáum við hátt hlutfall viðskiptavina velja sjálfsafgreiðslu. Nýju kassarnir virka vel og notkun þeirra hefur gengið vonum framar,“ segir Karen Rúnarsdóttir markaðsstjóri Krónunnar.

Tilgangurinn með sjálfsafgreiðslulausnum er að draga úr álagi í verslunum og stytta biðraðir. Afgreiðslukerfið er einfalt og allir sem greiða með greiðslukorti geta notað það. „Við finnum hvernig sjálfsafgreiðsluviðbótin losar hraðar um raðir á annasömum dögum. Í verslun okkar í Nóatúni fórum við úr því að vera með fjóra afgreiðslukassa yfir í sjö. Það segir sig sjálft að þá minnka raðirnar. Sumir viðskiptavinir kjósa hinsvegar að versla á hefðbundnum kassa og það er líka í góðu lagi. Við viljum að viðskiptavinir okkar hafi val. Okkur finnst gaman að sjá hvað fólk er tilbúið að prófa og við erum alltaf með starfsmann á sjálfsafgreiðslusvæðinu til þess að aðstoða og leiðbeina,“ segir Karen.

Advania þjónustar afgreiðslukerfið í Krónunni en kassarnir eru framleiddir af NCR sem er leiðandi á heimsmarkaði í afgreiðslulausnum. Kerfið er því þaulprófað um allan heim og er einstaklega notendavænt.
„Við fögnum því að tæknin sé farin að auðvelda okkur innkaupin og draga úr röðum við afgreiðslukassa. Reynsla Krónunnar er í takt við þróunina í Evrópu þar sem neytendur velja sjálfsafgreiðslulausnir í matvöruverslunum í auknum mæli,“ segir Ægir Már Þórisson forstjóri Advania.

Að sögn Karenar er unnið að því að setja upp sjálfsafgreiðslukassa í fleiri verslunum Krónunnar. „Við bíðum bara spennt eftir næstu pöntun til þess að geta haldið þessari vegferð áfram,“ segir Karen.


Allar fréttir
Mynd með frétt

Ný nálgun á ráðningar

Advania og 50skills vinna saman að nýrri nálgun á ráðningar og virkjun nýrra starfsmanna á vinnustöðum.

Lesa

Eins og innbrot á heimilið

Það var ekki laust við að stjórnendum Arctic Trucks hafi brugðið þegar þeir uppgötvuðu að svikahrappar höfðu stolið nærri 40 milljónum króna af erlendum viðskipavini fyrirtækisins á dögunum.

Lesa

Einar og Jón Brynjar í framkvæmdastjórn Advania

Einar Þórarinsson og Jón Brynjar Ólafsson hafa verið ráðnir framkvæmdastjórar hjá Advania. Breytingar hafa verið gerðar á skipulagi fyrirtækisins sem miða að því að efla félagið enn frekar sem þjónustufyrirtæki í upplýsingatækni.

Lesa