VIA equity og PFA fjárfesta í Advania

Fréttir
04.09.2018
Fjárfestingasjóðurinn VIA equity og stærsti lífeyrissjóður Danmerkur, PFA, hafa keypt 30% hlut í Advania AB.

VIA equity er leiðandi fjárfestingasjóður í Norður-Evrópu og PFA stærsti lífeyrissjóður Danmerkur. Sjóðirnir hafa bæst í eigendahóp Advania AB með kaupum á 30% hlut í félaginu.

Advania varð til árið 2012 við samruna nokkurra upplýsingatæknifyrirtækja á Norðurlöndum. Nordic Mezzanine, sænskir fjárfestar og norrænir lykilstjórnendur Advania keyptu meirihluta í félaginu tveimur árum síðar og einsettu sér að auka vöxt og arðsemi þess. Advania hefur vaxið umtalsvert síðan og hefur reksturinn gengið afar vel. Í fyrra jukust tekjur félagsins um 60% milli ára og námu SEK 2.804m (ISK 35.031m) og jókst EBITDA um 59% milli ára og nam SEK 258m (ISK 3.223m).

Eigendur Advania hafa mikla trú á að skapa viðskiptavinum aukið virði með snjallri notkun á upplýsingatækni. Sú stefna að setja hag viðskiptavina ofar öðru hefur skapað Advania stöðu sem leiðandi þjónustufyrirtæki á norrænum upplýsingatæknimarkaði. Fjárfesting VIA equity og PFA styrkir rekstur Advania enn frekar og gerir félaginu kleift að halda áfram að vaxa með stefnumiðuðum kaupum og sameiningum.


Gestur G. Gestsson, forstjóri Advania:
„Starfsfólkið er verðmætasta auðlind Advania og það sem gerir okkur samkeppnishæf. Við höfum verið svo lánsöm að laða að okkur margt hæfileikaríkasta fólkið í geiranum sem sameinast í að skapa verðmæti fyrir viðskiptavini okkar. Sú stefna og dugnaður er forsenda fyrir velgengni okkar. Við hlökkum til að vinna með nýjum hluthöfum sem deila þessari sýn og koma með sérfræðiþekkingu sem mun efla okkur á komandi árum. Það eru spennandi tímar framundan.”

Benjamin Kramarz, meðeigandi VIA equity:
„Mikil eftirspurn eftir þjónustu í upplýsingatækni heldur áfram að aukast á komandi árum. Heimurinn er að breytast, tæknin þróast hraðar en nokkru sinni fyrr og þörfin fyrir snjallar og notendavænar tæknilausnir er augljós. Advania hefur einstaka nálgun á upplýsingatækni-markaðinum, og uppfyllir þarfir viðskiptavinarins óháð framleiðendum og lausnum. Sú nálgun hefur sýnt sig að bera árangur og vakti athygli okkar. Við sjáum sóknarfæri í Advania þar sem fyrirtækjamenningin stuðlar að frekari vexti. Kaup í félaginu ríma því við fjárfestingastefnu okkar og Advania smellpassar inn í eignasafnið. Þess vegna áttum við frumkvæði að viðræðum við eigendur Advania og erum hæstánægð með árangurinn.”


Mynd: Stjórn Advania AB frá vinstri; Vesa Suurmunne, Katrín Olga Jóhannesdóttir, Birgitta Stymne Göransson, Thomas Ivarson og Bengt Engström.


Um Advania
Advania er norrænt félag í uppplýsingatækni með 22 starfsstöðvar í Svíþjóð, Noregi, Danmörku og Íslandi. Félagið aðstoðar viðskiptavini sína við að bæta árangur þeirra með framúrskarandi tæknilausnum. Advania þjónustar þúsundir viðskiptavina, alþjóðlegar samsteypur, ríkisstjórnir og opinberar stofnanir, stór og smá fyrirtæki á öllum sviðum samfélagsins. Advania á rætur sínar að rekja aftur til ársins 1939 þegar íslenskur frumkvöðull stofnaði viðgerðarþjónustu fyrir skrifstofubúnað í Reykjavík. Næstu áratugina urðu til þrjú tæknifyrirtæki í Noregi, Svíþjóð og á Íslandi sem voru sameinuð undir nafni Advania árið 2012. Nánari upplýsingar má finna á advania.com

Um VIA equity
Via equity er leiðandi fjárfestingarsjóður í Norður-Evrópu. Sjóðurinn leggur áherslu á fjárfestingar á sviði tækni og þjónustu. VIA equity Fond I K/S, Fond II K/S og Fond III K/S hafa hver um sig eiginfjárstöðu sem nemur um DKK 1 milljarði, og nemur eiginfjárstaða heildarinnar því um DKK 3 milljörðum. PFA og ATP standa að baki ríflega 99% eigin fjárs VIA equity Fund III K/S. Það fjármagn sem eftir stendur kemur frá starfsfólki VIA equity A/S. VIA equity er félagið sem rekur sjóðinn. VIA equity fjárfestir í stórum, miðlungsstórum og litlum félögum. Á sama tíma leggur VIA equity meiri áherslu á tilteknar atvinnugreinar en aðrir sambærilegir fjárfestingasjóðir. VIA equity hefur m.a. fjárfest í hugbúnaðar-, net-, tækni-, orku-, og þjónustufyrirtækjum. Dæmi um hugbúnaðar- og upplýsingtæknifyrirtæki sem sjóðurinn á eða hefur átt hluti í eru: Adra Software AS, KMD A/S, Adform ApS, ePocket Solutions AS, DDD Retail A/S, Projectplace AB, ComActivity AB, Dolphin Software AS, Frontmatec A/S, Daldata AS, Hostnordic A/S, UVData A/S, Conscia A/S, Nets A/S, Profit Software Oy og Mansoft A/S.

UM PFA
PFA var stofnað af fjölmörgum dönskum stéttar- og starfsmannafélögum árið 1917 sem í þeim tilgangi að tryggja fjárhagslega örugga framtíð starfsfólks og fjölskyldna þeirra. Í dag er PFA stærsti lífeyrissjóður í Danmörku með meira en DKK 500 milljarða (EUR 67 milljarðar) í umsjón. Viðskiptavinir PFA eru um 1,2 milljónir og koma úr mörgum af stærstu fyrirtækjum og félögum í Danmörku. Á undanförnum árum hefur PFA ráðist í umfangsmiklar fjárfestingar á félögum sem starfa á sviði fjárfestinga, innviða og lánshæfis í samræmi við eina af fjárfestingastefnum sjóðsins. Sjóðurinn hefur meðal annars fjárfest í Walney Extension Offshore Wind Farm, Danish Ship Finance, Avantor og TDC. Á árinu 2017 fór sjóðurinn fyrir hópi danskra lífeyrissjóða í DKK 11.6 milljarða kaupum á Nykredit, en um var að ræða stærstu fjárfestingu stofnanafjárfesta í Danmörku.




Allar fréttir
Mynd með frétt

Landsbjörg fær tölvu sem má fara í uppþvottavél

Advania færði Landsbjörgu eina sterkustu tölvu sem hægt er að finna á landinu, til að nota í björgunarstarfi sínu.

Lesa

Með eina æðstu gráðu frá Cisco

Einn af netkerfasérfræðingum Advania, Steinn Örvar Bjarnarson, lauk nýlega stífu námi og hlaut eina æðstu gráðu sem hægt er að fá frá Cisco. Sérþekking Steins Örvars nýtist sérstaklega í bilanagreiningu, ráðgjöf og gæðamati á netkerfum.

Lesa

Er þín vefverslun tilbúin fyrir jólin?

Að mörgu er að huga í vefverslun á háanna tíma. Það þarf að hlúa að vefverslunum af sömu natni og hefðbundnum verslunarrýmum, framsetning þarf að vera góð og skilmálar skýrir.

Lesa