Ásta Emma var bitin af hjólabakteríunni

Fréttir
26.10.2018
Hjólamenningin hjá Advania blómstrar sem aldrei fyrr. Um 50% starfsmanna nýtir aðra ferðamáta en einkabíl til og frá vinnu, samkvæmt nýlegri starfsmannakönnun.

Ásta Emma Ingólfsdóttir er ein af fjölmörgum starfsmönnum Advania sem hjóla reglulega í vinnuna. Hún sér margvíslegan ávinning af því að velja hjólið fram yfir bílinn.

„Ég byrjaði að hjóla í vinnuna fyrir átta árum, í hjólaátakinu „Hjólað í vinnuna“. Fyrir þann tíma hafði ég ekki hjólað mikið. Ég bý á Álftanesi en vinnustaðurinn minn var þá í Ármúlanum. Ég byrjaði því á að hjóla um það bil 15 kílómetra vegalengd hvora leið. Mér fannst þetta strax skemmtilegt og við vinnufélagarnir stofnuðu liðið Hjólahjörtun sem hefur oft unnið til verðlauna í „Hjólað í vinnuna“.
Það myndaðist líka góð stemming fyrir keppninni innan fyrirtækisins, sérstaklega þegar vinnufélagarnir „slóruðu“ saman heim eftir vinnu. Þá lærði maður nýjar hjólaleiðir og smám saman var ekki orðið svo langt að hjóla upp í Mósó eða að Gróttu á leiðinni heim. Með tímanum jókst áhuginn og þegar ég var í stuði og veðrið var gott lengdi ég ferðina og hjólaði um 40-60 km á dag. Svo fór að ég keypti mér nagladekk til að geta hjólað á veturna, þegar stígurinn út á Álftanesið var ófær,“ segir Ásta Emma.

Í fyrra hjólaði hún 1300 km ásamt tveimur Advania-starfsmönnum og öðrum Team Rynkeby félögum. Ferðalagið lá frá Kaupmannahöfn til Parísar og var hjólað til styrktar krabbameinssjúkum börnum á Íslandi. Fyrir þann tíma hafði Ásta Emma lengst hjólað 100 kílómetra á einum degi og mest 1000 kílómetra á einum mánuði. Hún þurfti því að æfa sig vel fyrir ferðina þar sem allir í liðinu hjóla saman upp undir 200 kílómetra á dag, 8 daga í röð. Hún fór því að sækja sérstakar hjólaæfingar og nota hvert tækifæri til að hjóla til og frá vinnu.

„Að hjóla er orðinn lífsstíll hjá mér. Ég er í kyrrsetuvinnu á daginn og þá er mín líkamsrækt og hugleiðsla að hjóla 40-60 kílómetra sem oftast í og úr vinnu. Þetta sparar líka bensínskostnað og oft er ég sneggri á hjóli en á bíl þegar umferðin er mikil.“


Allar fréttir
Mynd með frétt

Ný nálgun á ráðningar

Advania og 50skills vinna saman að nýrri nálgun á ráðningar og virkjun nýrra starfsmanna á vinnustöðum.

Lesa

Eins og innbrot á heimilið

Það var ekki laust við að stjórnendum Arctic Trucks hafi brugðið þegar þeir uppgötvuðu að svikahrappar höfðu stolið nærri 40 milljónum króna af erlendum viðskipavini fyrirtækisins á dögunum.

Lesa

Einar og Jón Brynjar í framkvæmdastjórn Advania

Einar Þórarinsson og Jón Brynjar Ólafsson hafa verið ráðnir framkvæmdastjórar hjá Advania. Breytingar hafa verið gerðar á skipulagi fyrirtækisins sem miða að því að efla félagið enn frekar sem þjónustufyrirtæki í upplýsingatækni.

Lesa