Störfin sem skapast á Íslandi

Fréttir
13.03.2019

Mun sjálfvirknivæðingin útrýma fleiri störfum en hún skapar? Þetta var rætt á morgunvakt Rásar 1 í morgun þar sem Ægir Már Þórisson forstjóri Advania sagði það líklegt að tækniframfarirnar skapi fleiri störf en þær útrýma.

Rætt var um nýja skýrslu forsætisráðuneytisins um Ísland og fjórðu iðnbyltinguna og hverjar afleiðingar hinna miklu sjálfvirknivæðingar verði á íslenskt atvinnulíf. Meðal þess sem fram kemur í greiningarvinnu skýrsluhöfunda er að um 86% starfa hverfi eða breytist verulega á næstu árum. Aðeins 14% starfa haldist óbreytt.

Ægir benti á að í umræðunni væri meira gert úr ógnunum og þeim störfum sem eru að hverfa en tækifærunum sem felast í breytingunum og störfunum sem eiga eftir að verða til. Til dæmis sé það ályktun í skýrslu McKenzie; Jobs lost, jobs gained frá árslokum 2017 að fjölmargar breytur gefi til kynna að störfin sem verði til, verði fleiri en þau sem tapist. Að jafnvel þó sjálfvirknivæðing geti útrýmt um 73 milljón starfa í Bandaríkjunum fyrir árið 2030 muni mannfjöldaaukning, hækkandi meðalaldur, meiri neysla, aukin framleiðslugeta og uppgangur fjármálakerfisins leiða til þess að atvinnulífið stækki og störfum fjölgi.

Í spjallinu voru tekin dæmi af sjálfvirknivæðingu sem Advania hefur leitt í íslensku samfélagi svo sem að setja upp sjálfsafgreiðslukassa í matvöruverslunum. Þegar tilkynnt var um það fyrir ári síðan að Krónan ætlaði að bjóða uppá sjálfsafgreiðslu sem valkost í verslunum sínum, voru fyrstu spurningar: hvað verður um afgreiðslustörfin?

 Ferlið hófst með einni verslun og var fyrirhugað að stíga varlega inn í þessar miklu breytingar. Viðtökurnar voru hinsvegar svo góðar að Krónan fór hraðar í ferlið en upphaflega stóð til. Síðan þá hafa allar stærstu matvöruverslunarkeðjur landsins ákveðið að bjóða sjálfsafgreiðslu sem valkost.

Nú ári síðar velur helmingur viðskiptavina sjálfsagreiðslu en samt hefur enginn starfsmaður misst vinnuna hjá Krónunni. Starfið í verslunum hefur breyst og þeir sem áður sinntu afgreiðslu geta varið meiri tíma í að hlúa að versluninni og veita viðskiptavinum þjónustu.

Afgreiðslustarfið sjálft hafði ekki þróast eða breyst í áraraðir en nú eru fyrirsjáanlegar miklar breytingar á verslunarháttum. Það er varhugavert að hræðast þær alfarið, að mati Ægis.

Hér má hlusta á viðtalið við Ægi, spjallið hefst á 37.40 mín. 

 



Allar fréttir
Mynd með frétt

Forritarar Advania í hlutverk hakkara

Forritarar Advania brugðu sér í hlutverk hakkara í dag og tóku þátt í hakkaþoni á vegum Syndis. Markmiðið var að þjálfa forritarana í að koma auga á algeng forritunarmistök.

Lesa

Fjölmenn heimsókn FKA-kvenna

Fjölmennt var í fyrirtækjaheimsókn FKA sem fór fram í húsakynnum Advania á dögunum. Um 50 konur mættu á staðinn.

Lesa

Vegna fyrirhugaðra kaupa Advania á Wise Lausnum ehf

Advania og Wise sendu Samkeppniseftirlitinu tilkynningu um samruna félaganna fyrir nokkru. Wise er öflugur söluaðili á Microsoft Dynamics NAV fjárhagshugbúnaði bæði hér á landi og erlendis. Hjá Advania, líkt og hjá Wise, starfa fjölmargir sérfræðingar í Microsoft Dynamics NAV. Líkt og hjá Wise er um að ræða viðskiptavini bæði innanlands og utan. Við samruna félaganna tveggja yrði til eining sem gæti betur mætt síaukinni og harðnandi alþjóðlegri samkeppni um fjárhagshugbúnað.

Lesa