Advania færir Píeta-samtökunum tölvubúnað

Eftir páska opna Píeta-samtökin hús í Reykjavík þar sem þeim sem glíma við sjálfsvígshugsanir og sjálfskaða, verður rétt hjálparhönd. Advania færði samtökunum allan nauðsynlegan tölvubúnað til að geta hafið starfsemi í húsinu.

Eftir páska opna Píeta-samtökin hús í Reykjavík þar sem þeim sem glíma við sjálfsvígshugsanir og sjálfskaða, verður rétt hjálparhönd. Advania færði samtökunum allan nauðsynlegan tölvubúnað til að geta hafið starfsemi í húsinu.
Sjálfsvígs- og sjálfskaðamiðstöðin verður staðsett að Baldursgötu 7 í Reykjavík. Þeir sem eru í sjálfsvígshugleiðingum eða stunda sjálfskaða geta leitað hjálpar í húsinu og fengið 15 fría tíma hjá sálfræðingi eða geðhjúkrunarfræðingi. Aðstandendur eiga einnig kost á 5 fríum tímum. Þá verður boðið uppá þjónustu fyrir fólk sem misst hefur ástvini í sjálfsvígi og starfræktir stuðningshópar sem koma saman í húsinu. Stuðlað verður að þeim bjargráðum sem eru möguleg sem forvörn en einnig lögð áhersla á eftirfylgd ef sjálfsvíg hefur orðið.

Píeta þýðir umhyggja. Það er stefið í starfsemi samtakanna og þess vegna er mikið lagt upp úr því að húsnæðið við Baldursgötu verði hlýlegur staður heim að sækja. Almenna leigufélagið lánar samtökunum húsnæðið og fjölmörg fyrirtæki og félagasamtök hafa lagt sitt af mörkum til að innrétta það á huggulegan hátt. Á næstu árum stendur til að opna svokölluð Píeta-skjól í öllum landsfjórðungum.

Edda Arndal geðhjúkrunarfræðingur er forstöðumaður hússins og Björk Jónsdóttir skólastjóri er formaður samtakanna. Ráðgjafaráð skipað fræðimönnum úr háskólasamfélaginu er ætla að vera vakandi yfir störfum Píeta-samtakanna. Fræðimennirnir hafa allir reynslu af því að missa náinn ástvin úr sjálfsvígi.

Markmið Píeta á Íslandi er að opna umræðu um sjálfsvíg og ná til fólks í sjálfsvígshugleiðingum. Fyrirmynd samtakanna og miðstöðvarinnar er sótt til Írlands þar sem á annan tug slíkra húsa eru starfrækt. Árlega fá um 17 þúsund einstaklingar þjónustu í Píeta-húsunum þar í landi og hafa samtökin einnig sprottið upp í Bandaríkjunum og Ástralíu.

Við hjá Advania óskum Píeta-samtökunum góðs gengis í þeim mikilvægu verkefnum sem þau hafa tekið að sér.

Sirrý Arnarsdóttir framkvæmdastjóri Píeta Ísland tók við tölvubúnaði fyrir nýja húsnæðið frá Ægi Má Þórissyni forstjóra Advania.