Ný stilling í Copilot sem þú ættir að slökkva á
Stefán Ingi Árnason
arkitekt í netöryggi hjá Skjaldarteymi Advania
Ný stilling sem Microsoft hefur nú sjálfkrafa virkjað hjá hjá öllum Copilot notendum innan Evrópu hefur áhrif á hvar gagnaúrvinnsla gervigreindartólsins fer fram. Ég ráðlegg fólki að slökkva á þessari stillingu.
Frá og með 17. apríl 2026 hefur Microsoft sjálfkrafa kveikt á eiginleika sem kallast „Flex Routing“ í öllum Copilot umhverfum í Evrópu. Á álagstímum sendir Copilot nú gervigreindarvinnslu á netþjóna utan Evrópu til að halda svartíma stöðugum. Vistuð gögn eins og tölvupóstur, skrár og svo framvegis verða áfram innan evrópskar lögsögu, en vinnsla gagna getur átt sér stað utan Evrópu.
Hvað þýðir breytingin?
Copilot fyrir Microsoft 365 er spennandi tól sem nýtir krafta gervigreindar til að hnýta saman máltækni og gagnabanka á gagnlegan hátt og efla mátt starfsfólks. Vinsældir Copilot eru gríðarlegar, en þessi aukna notkun varð til þess að Microsoft hefur fært ákveðna úrvinnslu á gögnum út fyrir Evrópu á álagstímum.
Copilot hefur vaxið það ört að Microsoft er að eiga í erfiðleikum með að anna eftirspurninni sem hefur áhrif á álagstímum. Einhverjir notendur upplifa þá hægari úrvinnslu og var því farið þessa leið til að reyna að bæta notendaupplifunina.
Hvað þýðir þetta fyrir notendur?
Þetta snýst í rauninni um GDPR, því ef fyrirtækið þitt hefur nú þegar gefið út notkunarskilmála á gagnavinnslu, þarf mögulega að endurskoða einhver atriði í skilmálanum ef þið ætlið að halda þessari stillingu á.
Það sem er að færast utan Evrópu með þessari stillingu er gagnavinnslan sem á sér stað þegar gervigreindarmódel álykta eða vinna úr kvaðningu (e. prompt) frá þér og koma með svar.
Við vonum auðvitað að Microsoft sé að vinna hratt í því að byggja upp fleiri gagnaver í Evrópu til að anna þessari miklu eftirspurn þegar kemur að gervigreind.
Taka skal fram að þessi stilling er ekki GDPR brot, því gögnin sjálf eru ekki að flytjast út fyrir Evrópu, eingöngu úrvinnslan.
Mín ráðlegging er samt sú að fólk afvirki þessa stillingu. Þeir einu sem ættu að íhuga að hafa þessa stillingu á, eru þeir sem eru að upplifa hægagang innan Copilot og þurfa snarpari svör. Þá þarf samt að vera meðvitaður um þessa breytingu á úrvinnslunni.
Hvernig er hægt að breyta þessu?
Notendur geta valið að breyta stillingunni til baka og slökkva þannig á Flex Routing svo öll gagnavinnsla eigi sér stað innan Evrópu líkt og áður, á kostnað svartíma þjónustunnar á álagstímum.
Það er ótrúlega einfalt og fljótlegt að slökkva á þessari stillingu og sömuleiðis að breyta svo aftur til baka ef upplifunin af því er ekki góð.
- Skráðu þig inn í Microsoft 365 admin center sem stjórnandi með hlutverkið AI Administrator.
- Farðu í Copilot → Settings → View all → Flex routing during peak load periods.
- Ef þú vilt ekki leyfa flex routing, veldu Do not allow flex routing (Ekki leyfa flex routing). Ef þessi valkostur er valinn mun LLM-úrvinnsla fara fram innan gagnamarka ESB, jafnvel á tímum mikils álags.
Öll skuldbinding Microsoft 365 varðandi gagnavinnslu og staðsetningu gagna (e. data residency) halda áfram að gilda. - Ef þú vilt leyfa breytinguna á að vera hakað við Allow flex routing during periods of peak load (Leyfa flex routing á tímum mikils álags).
Þessi stilling heimilar að LLM-úrvinnsla (e. inferencing) og geymsla á tengdum dulnefndum (e. pseudonymized) gögnum geti farið fram utan gagnamarka ESB á tímabilum þar sem álag er mest. Samkvæmt upplýsingum frá Microsoft eru slík tímabil yfirleitt í skamman tíma og ekki samfelld.
 (1).png)
Microsoft Copilot er frábært gervigreindartól sem nýtir þá þekkingu sem er til staðar til að auka framleiðni þeirra sem nýta tólið. Copilot getur sparað þér tíma og auðveldað vinnuflæði með aðstoð við hin ýmsu verkefni, hvort sem það er textagerð, gagnavinnsla, kynningar eða önnur verkefni. Það hefur ekki breyst. Ekki hika við að hafa samband við okkur ef þú hefur einhverjar spurningar.