7.5.2014 | Blogg

Fjármálahreysti: Tölvuleikur sem styður við fjármálalæsi

advania colors line
Í apríl gaf Landsbankinn út nýjan tölvuleik, Fjármálahreysti, sem smíðaður var frá grunni af Vefdeild Landsbankans með liðsinni sérfræðinga frá Advania. Leikurinn var þróaður í samstarfi við Ómar Örn Magnússon, aðstoðarskólastjóra Hagaskóla og er leiknum ætlað að efla fjármálalæsi ungmenna. Allir geta tekið þátt í leiknum en nemendur í efstu bekkjum grunnskóla keppa sérstaklega sín á milli. Sú keppni hófst 8. apríl og lýkur á sunnudaginn, 11. maí. 
  
 

Sérstaklega hannaður fyrir snjalltæki

Leikurinn er sérstaklega ætlaður til spilunar í snjalltækjum. Um er að ræða vefsvæði sem skrifað er í AngularJS, .NET og C#. Vefurinn nýtir sér REST-vefþjónustu ofan á Oracle-gagnagrunni. Vefurinn var hannaður í Adobe Illustrator þar sem vigrum (e. vectors) var beitt til hins ítrasta.
 

Frábær þátttaka

Keppnin hefur farið vel af stað og nú hafa um 2.500 þátttakendur hafið leik. Keppendur fá ekki bara stig fyrir að standa sig vel, heldur geta þeir einnig unnið orður fyrir framgang sinn og frammistöðu í leiknum. Þeir geta síðan deilt orðunum á Facebook.
 

Farsælt samstarf um fjármálafræðslu

Landsbankinn og Ómar Örn hafa í rúman áratug unnið saman að fjármálafræðslu í efstu bekkjum grunnskóla, lengst af undir merkjum Raunveruleiksins sem var stór keppni á milli nemenda í grunnskóla. Í Raunveruleiknum þurftu nemendur að glíma við verkefni sem flestir þurfa að leysa á lífsleiðinni: stilla útgjöld af miðað við tekjur, sækja um lán, safna fyrir íbúð og svo framvegis. Raunveruleikurinn hlaut á sínum tíma verðlaun Norrænu ráðherranefndarinnar sem besta námsefnið í fjármála- og neytendafræðslu. 

Fjármálahreysti tekur við hlutverki Raunveruleiksins. Við hönnun leiksins var lögð áhersla á að hann yrði í senn fróðlegur, spennandi og skemmtilegur. Og hann er líka gagnlegur því rannsóknir sýna að þeir sem notið hafa kennslu í fjármálum eru líklegri til að spara og skipuleggja fjármál sín betur en aðrir.

Fjölbreyttur og skemmtilegur leikur

Við gerð leiksins var miðað við ramma OECD í fjármálafræðslu fyrir 15 ára gömul ungmenni sem er sami rammi og notaður er í PISA-rannsóknunum. Þessi rammi byggist á þekkingu, færni og viðhorfum. Miðað er við að 15 ára unglingar eigi að kunna skil á fjármálum einstaklinga, fjármálum heimilis og samfélags ásamt fjármálum náms- og atvinnuumhverfis. Þátttakendur í leiknum þurfa að þekkja ýmis hugtök, reikna og skilja myndrit. Þeir þurfa líka að mynda sér skoðun á því hvað er skynsamlegast að gera við mismunandi aðstæður. 


Leikurinn gengur út á að leysa 64 verkefni í sem fæstum tilraunum. Verkefnin eru á fjórum efnissviðum og í jafnmörgum þyngdarstigum. Efnissviðin fjögur eru: ég, heimilið, nám og atvinna og samfélagið. Spurningum er raðað í sextán verkefni sem hvert inniheldur fjögur skref. Byrjað er á efnissviðinu "ég" sem er auðveldast, síðan er tekist á við "heimilið" sem er aðeins erfiðara (eins og flestir vita) og svo koll af kolli þar til erfiðasta þyngdarstiginu er náð, þ.e. "samfélaginu". 

Til mikils að vinna

Til mikil er að vinna fyrir þátttakendur í Fjármálahreysti. Í fyrstu verðlaun er iPhone 5s en annað og þriðja sæti hljóta iPad mini. Einnig eru veittar viðurkenningar til skóla sem eiga hlutfallslega flesta þátttakendur. 

 

TIL BAKA Í EFNISVEITU