„Framtíðin verður öfgakennd, hún getur orðið mjög góð eða mjög slæm“
„Allt sem við tengjum við náttúrulega greind, þegar það færist yfir í vél, þá er það gervigreind.“ Í nýjasta þætti af hlaðvarpinu Tæknital ræðir Ole Winther, prófessor í vélrænu námi við Danmarks Tekniske Universitet (DTU), um þróun gervigreindar, tengsl akademíu og atvinnulífs og hvað muni móta næstu skref í gervigreindarbyltingunni.
Ole hefur unnið á sviðinu í yfir þrjá áratugi og upplifað bæði tímabil stöðnunar og þau hraðfara framfaraskref sem hafa átt sér stað undanfarin ár. Að hans sögn var aukið reikniafl og stærri tauganet lykillinn að núverandi þróun.
„Þegar við gátum farið að skala þjálfunina og stærð tauganetanna, þá fór allt af stað af fullum krafti.“
Ole bendir á að helsta breytingin í dag snúist ekki bara um tæknina sjálfa heldur hvernig hún umbreytir vinnubrögðum. Áherslan hefur færst frá einfaldri leit að upplýsingum yfir í raunverulega framleiðni.
„Það snýst ekki lengur um að búa til góða leit eða spjalllausn, heldur um hvernig fólk notar þessi verkfæri í daglegu starfi.“
Þróunin hefur einnig áhrif á menntun. Gervigreind gerir nemendur skilvirkari, en vekur jafnframt spurningar um nám og færni.
„Til að læra þurfum við oft að glíma við verkefnin og gervigreindin tekur að hluta þann þátt í burtu.“
Þrátt fyrir það telur Ole að framþróunin muni halda áfram á miklum hraða
„Ný byltingarskref munu koma á tveggja til þriggja mánaða fresti.“
Í lok þáttarins dregur hann upp mynd af framtíð sem verður afgerandi.
„Framtíðin verður öfgakennd, hún getur orðið mjög góð eða mjög slæm.“
Þátturinn veitir innsýn í hvernig einn reyndasti sérfræðingur Evrópu sér þróun gervigreindar og undirstrikar að næstu ár geti markað grundvallarbreytingar á því hvernig við vinnum, lærum og tökum ákvarðanir.