Misskilningurinn er að við eigum að gera allt sjálf
Í nýjasta þætti af Tæknitali ræðir Áslaug Arna Sigurbjörnsdóttir fyrrverandi ráðherra og þingmaður um gervigreind, nýsköpun, framtíðina og þær stórfelldu breytingar sem tæknin gæti haft á stjórnsýslu og lýðræði á næstu árum.
Áslaug Arna leiddi fyrstu aðgerðaráætlun Íslands í gervigreind og sat í lykilstöðu þegar ChatGPT ruddi sér til rúms árið 2022. Hún segir fyrstu viðbrögðin víða hafa einkennst af varfærni og umræðu um takmarkanir, en telur að mikilvægara sé að horfa til tækifæranna.
„Það eru alltaf fleiri tækifæri heldur en áskoranir og erfiðleikar.“
Í þættinum rifjar hún upp hvernig nýtt ráðuneyti háskóla-, nýsköpunar- og iðnaðarmála varð til á sama tíma og gervigreind fór að hafa áhrif á flest svið samfélagsins. Að hennar mati skapaði það ný tækifæri til að tengja saman menntun, rannsóknir, nýsköpun og stafræna innviði.
Áslaug Arna segist jafnframt hafa haft áhyggjur af því að Ísland myndi bregðast of hægt við þróuninni. Þó ábyrg notkun gervigreindar sé mikilvæg telur hún að óhófleg varfærni geti reynst kostnaðarsöm.
„Það er ekki ábyrg notkun gervigreindar að missa samkeppnisforskot.“
Hún bendir á að Ísland búi yfir ýmsum styrkleikum sem gætu nýst vel í innleiðingu nýrrar tækni, meðal annars litlu og sveigjanlegu samfélagi, sterkum stafrænum innviðum og stuttum boðleiðum.
Hluti af þessari framtíðarsýn birtist í verkefninu AI-þingi, sem Áslaug Arna setti á laggirnar ásamt Rafni Steingrímssyni. Þar líkja gervigreindarfulltrúar eftir þingmönnum, ræða frumvörp og taka afstöðu til mála á svipaðan hátt og gerist á Alþingi.
„Þetta var meira gert til að sýna fram á hvað við erum komin langt og ögra umræðunni.“
Að hennar mati gæti gervigreind nýst til að styrkja löggjafarstarf með því að greina áhrif lagasetningar, bera saman reynslu annarra ríkja og styðja við upplýstari ákvarðanatöku.
Í lok þáttarins ræðir Áslaug Arna einnig um stöðu lýðræðisríkja í heimi hraðra tæknibreytinga. Hún telur að ein helsta áskorunin sé að stjórnvöld og stofnanir nái ekki alltaf að þróast í takt við samfélagið.
„Getum við notað þessa ótrúlegu tækni til þess að bæta þetta óskilvirka kerfi?“
Að mati Áslaugar Örnu felst samkeppnisforskot Íslands ekki í því að endurskapa allt sem stærri þjóðir eru þegar að þróa, heldur í því að vera fljót að tileinka sér nýjar lausnir og nýta þær til að skapa verðmæti hér heima.
„Misskilningurinn er að við eigum að gera allt sjálf.“
Þáttinn má finna á Spotify og einnig er hægt að hlusta í gegnum spilarann hér fyrir neðan.