Sylvía Rut Sigfúsdóttir
samskiptastjóri Advania

Frá umræðu til hagnýtrar notkunar gervigreindar

Hugi Freyr Einarsson, forstöðumaður Business Central hjá Advania, fór yfir hvernig fyrirtæki geta nýtt Copilot, agenta og aðrar gervigreindarlausnir með Business Central. Meðal annars var fjallað um sölupöntunar-, innkaupareikninga- og kostnaðarerindreka sem geta tekið að sér skilgreinda ferla, en notandinn hefur áfram lokaorðið í vinnslunni.

Einnig voru sýnd hagnýt dæmi um hvernig hægt er að eiga samskipti við Business Central á mannamáli með Claude eða Copilot, meðal annars til að taka saman upplýsingar um rekstur, skoða viðskiptamenn og greiðslur og vinna með gögn úr kerfinu.

Samhliða var lögð áhersla á að innleiðing gervigreindar þurfi að byggja á skýrum forsendum. Fyrirtæki þurfi meðal annars að huga að gervigreindarstefnu, persónuvernd, kröfum eftirlitsaðila og gæðum niðurstaðna.

Nýjungar í Business Central 29

Dagný Björk Stefánsdóttir, deildarstjóri þróunar hjá Advania, kynnti helstu nýjungar í Business Central 29. Microsoft gefur út tvær stórar Business Central uppfærslur á ári, í apríl og október, auk minni mánaðarlegra uppfærslna.

Meðal nýjunga sem farið var yfir voru breytingar á leit og greiningarstillingum, samsett útlit skjala, nýjungar í Shopify-tengingum, sjálfbærni og möguleikar á stjórnun aðalgagna milli umhverfa. Einnig var fjallað um væntanlega tengingu Business Central gagna við Microsoft Fabric.

Nýjungar í viðbótum Advania

Hjörtur Geirmundsson, ráðgjafi og vörueigandi hjá Advania, fór yfir breytingar og nýjungar í viðbótum Advania. Þar á meðal voru nýjungar í samþykktum, banka- og greiðslulausnum, launakerfi, áskriftarreikningum, rafrænum reikningum og verkefnabókhaldi.

Nýtt Business Central app Póstsins

Auður Ósk Vilhjálmsdóttir, stafrænn vörustjóri hjá Póstinum, kynnti nýtt app Póstsins fyrir Business Central. Markmiðið er að auðvelda aðgengi að þjónustu Póstsins og færa umsýslu sendinga inn í Business Central, með einfaldari ferlum, aukinni sjálfvirkni og betri yfirsýn.

Í appinu er meðal annars hægt að vinna beint úr sölupöntun, flytja upplýsingar viðskiptamanns sjálfkrafa yfir, stofna strikamerki sjálfkrafa og sjá upplýsingar um stöðu sendinga innan Business Central.