Högni Hallgrímsson fór meðal annars yfir það hvernig fyrirtæki geta sparað sér mikla endurtekna handavinnu með réttri notkun tækninnar.
Fréttir, Power Platform - 12. mars 2026Gervigreindin tók yfir Viðskiptakerfadag Advania
Sylvía Rut Sigfúsdóttir
samskiptastjóri Advania
Árlegur Viðskiptakerfadagur Advania 2026 fór fram á Hilton í gær. Um 400 gestir mættu þar og sóttu sér þekkingu um fjölbreyttar viðskiptalausnir, nýjungar og tækifæri í stafrænni vegferð fyrirtækja.
Aðalfyrirlesari ráðstefnunnar var Kit Ingwersen frá Microsoft og fór hún í erindi sínu meðal annars yfir hvernig gervigreindarerindrekar geta gjörbylt því hvernig við vinnum. Kit sagði það skýrt að það væri ekki lengur spurning hvort stjórnendur tækju þetta skref, heldur hvenær.
Áskorunin sem fyrirtæki og stofnanir standa frammi fyrir núna að hennar mati er nefnilega ekki hvort það eigi að innleiða erindreka í reksturinn, heldur hversu hratt og hversu meðvitað það er gert.
„Spurningin er ekki hvort gervigreindarerindrekar muni móta reksturinn þinn. Raunverulega spurningin er, hversu markvisst þú ferð í þessa vegferð. Tengir þú erindreka ofan á núverandi ferla? Eða endurhugsar þú alveg hvernig fyrirtækið þitt starfar?“
Auðvitað gaf Kit líka innsýn í allt það sem er nýtt og spennandi fram undan hjá Microsoft og það sem vorið mun bjóða upp á.
Á sameiginlegu línunni kom einnig fram Högni Hallgrímsson forstöðumaður gervigreindar og sjálfvirkni hjá Viðskiptalausnum Advania. Hann sýndi nokkur dæmu um það hvernig notkun tækninnar hefur sparað fyrirtækjum hér á landi tíma, lækkað kostnað, dregið úr handavinnu, fækkað villum í skráningum og einfaldað ferla.
Eftir hlé skiptist ráðstefnan í þrjár línur, Business Central, F&O og Power Platform. Dagurinn endaði svo á sameiginlegu kokteilboði og góðum samtölum á sýningarsvæði ráðstefnunnar.
